رياضة
أيمن الرمادي المدير الفني لنادي الزمالك بعد التعادل مع سيراميكا كليوباترا
- الفريق محتاج شغل كتير، بنمر بظروف صعبة جدًا، وعندنا غيابات كتيرة، والدكة كانت ناقصة عناصر هجومية.
- عندنا أسطول إصابات، وبتمنى يرجعوا بسرعة، اشتغلنا من يومين بس، ورغم كده أنا مبسوط من الفريق وعطاؤهم، صحيح التعادل مش النتيجة اللي كنا عايزينها بس الأهم دلوقتي هو الشغل وبناء طريقة أداء
- التدرج بالكرة كان أحسن للزمالك، وبلّغت اللاعيبة هارد لك، هما عملوا اللي عليهم، ولو في سلبيات فهي تخصني أنا بس
- ليه أداء الزمالك عشوائي؟ مش موافق إن أداء الزمالك كان عشوائي، الكلمة دي تقيلة، إحنا بس مخلقناش فرص كفاية، وبنلعب في ظروف صعبة من غير عناصر مهمة، في وقت الفريق التاني كان كامل الصفوف ومع ذلك ملعبش فرص حقيقية
- الجو حر جدًا والطقس قاتل، وده بيأثر على الأداء
- كل مدرب ليه طريقة، وأنا عارف إمكانيات لاعيبة سيراميكا لأني دربتهم قبل كده، وهم كمان فاهمين طريقتي كويس
- الزمالك فيه لعيبة تساعدني نعدل المسار بسرعة، عندنا أسماء تقيلة زي بنتايج، عمر جابر، ناصر منسي، ناصر ماهر، والسعيد، محتاجين بس دعم نفسي وذهني مختلف علشان يبان مستواهم الحقيقي
- مشغلشي بالي بأي استفزاز، علاقتي حلوة بجماهير الكرة عمومًا وبجمهور الزمالك خصوصًا
- الزمالك عنده اتنين حراس كبار: محمد صبحي ومحمد عواد، واللي هيلعب فيهم هو الأنسب، ومن الطبيعي التاني يسأل ليه مش بيلعب
- زعلان من تراجع الأداء في آخر جزء من الماتش، وده راجع لحالة ذهنية ونفسية، بس السبب الأكبر بدني، ولازم نشتغل عليه ونعالجه
